by 蘋果日報 on Jan 9, 2016

哈佛仔搞App 真食評誓砌低OpenRice

哈佛仔搞App 真食評誓砌低OpenRice

做過投資銀行、私募基金,又讀埋哈佛商學院MBA,但八十後的羅正義(Dominic)及林喬峰(Kelvin),竟然係想做OpenRice?


Kelvin(左)及Dominic(右)二人皆為「金融才俊」,又識飲識食,整個package合乎不少拜金港女的「男神」標準。但「男神」亦有致命傷,好像Kelvin因對着鏡頭太生硬,多次被攝影師催促,他大嘆:「原來做model係咁難!」


App內食評大部分都為英文,Dominic稱現時開始提供中文版食評「試水溫」,由於坊間不少熱門食評都以中文為主,似乎有推出中文版的必要。


原來二人在美國讀書時,看到食評app Yelp在當地大行其道,遂決定回流,創立食評app FeedMe Guru,將在私募基金分析數據的技術,用於食評上。而Dominic更在碩士第二年休學,回港瞓身做app。在香港人人只識㩒OpenRice,但Dominic指OpenRice用途已淪為《黃頁》,做到變港版《米芝蓮》,才是他們真正目標:「《米芝蓮》其實唔係好多地區有,搵外國鬼佬評香港中菜,根本唔make sense。《米芝蓮》仲要咁多年都無app,其實都幾out!」


我覺得OpenRice已有十幾年歷史,但由於靠用戶去發放食評,久而久之會發展成宣傳工具,例如惡意中傷、「鱔稿」,令網站食評愈來愈唔可靠!我們想利用專業食評,更加有效幫網民挑選最好吃的餐廳。我同拍檔Kelvin,都做過私募基金,決定將分析數據應用於食評。例如,我哋會用「關鍵字」分析全港博客及雜誌嘅食評,如果文中經常出現「環境」、「餐具」等字眼,而甚少提及「食物」、「味道」等,我哋就唔會用,免得係假嘢。網民可以睇到真係講食物質素嘅食評外,亦可以選擇follow邊一位食評家,令推薦更加個人化。 而被評嘅餐廳,我哋特意挑選咗六百間,每星期更新一次,確保新餐廳也可以加入。網民可依菜式、地區等,選擇合適的餐廳,六百間好似好少,但都是我們精選最好食的!不好吃的選擇根本沒必要。不過這個數量,我們可依據用家的意見再調校。 而我們已建立好的分析系統,是可以支援不同市場;因為我們的目標,並不只是香港,而是亞洲! 我和拍檔Kelvin,其實在私募基金認識的,出差時經常到不同國家找好吃的餐廳。但要在網上做資料搜集,費時失事!到了美國讀書後,發現在全球最先進的國家,都有這問題,所以就萌生創業念頭。我們在哈佛都參加了不少創業比賽,已獲得六位數字港元的支持,足夠公司首半年營運。由於自己較熟悉亞洲市場,覺得發展空間更大,所以就決定回流。

撰文:梁延宇


攝影:鄭樹清、廖健昌、關永浩